2008年4月11日星期五

越南随时变世界工厂

4月10日,周四。恒生指数升202.53,收24187.1;成交748.13亿元。4月期指升64点,收24061点低水;担心今天港股又再跌。
  沪深三百指数升1.81%,收3754.72。相信只系大跌后嘅反弹。
  3月份只得台湾指数升1.9%、南韩跌0.45%、香港跌6.09%、日经跌7.92%、马来西亚跌8.09%、印尼跌10.09%、印度跌1%,以及沪深A股跌20.14%;今年首季亦只有台湾股市升0.78%、南韩跌10.18%、香港跌17.85%、日本跌18.18%、马来西亚跌13.67%、印尼跌10.87%、印度跌22.88%,以及中国跌34%。好景不常,台股由3月24日9049点起亦开始跌落嚟。
人民币升势难停
  索罗斯认为,全球信贷市场受次按影响,短期仍将恶化,CDS最近六个月升咗49%,为43万亿美元债券提供担保。根据国际结算银行资料今年上半年有机会出事嘅债券较去年同期上升145%,至7210亿美元。
  人民币汇价已升至6.9907兑1美元,估计未来十二个月再升11.2%,见6.288兑1美元(今年年底见6.7兑1美元)。人民币升值压力仲系好大,因2005年7月至今,人民币兑欧罗跌咗10%,未来上升11.2%亦只系追番过去兑欧罗嘅跌幅。
  英伦银行今晚或者减息0.25厘至5厘,将系去年12月以来第三次减息。去年9月至今英镑兑欧罗跌咗19%;IMF估计,今年GDP只系升1.6%(2007年上升3.1%)。
  瑞信推介中煤能源(1898),中煤能源今年每股获利估计92仙,升69.4%,O十四点四倍。
  高盛认为,沪深A股虽然经大幅调整,但系大幅反弹嘅机会唔大。官方政策唔会增加流动性,以免刺激CPI上升,过去四次减印花税(1998年6月12日、 99年6月1日、2001年11月16日及05年1月23日)都只系刺激股市短暂上升,唔可以改变股市大方向;以依家A股嘅O,未到可长线投资水平。
  花旗推介华润电力(836)及雨润食品(1068)。华润电力今年估计每股获利93仙,上升19.6%,O十八点四倍,目标价23元;雨润食品今年估计每股获利53.2仙,上升19.4%,O十七点六倍,目标价15.3元。
  4月8日至18日,内地鱼跃医疗、金钼股份、濮耐股份、三力士及紫金矿业五只新股陆续开始网上发行。不过,近日新股上市获利嘅空间收窄,例如中国太保、中海集运及中煤能源三只股票已齐齐跌破发行价,部分产品收益甚至不如存款利率,令认购新股热潮在下降中,更打破新股唔会赔钱嘅神话。
QDII表现失望
  本周深圳五幅土地拍卖只有一幅以6.9亿元卖出,建筑面积二十四万多平方米,楼面地价2836.48元一平方米,仅比2006年9月该地段一幅出让地楼面价高出319元一平方米,即深圳地价已重返2006年水平。为何去年12月起卖地一直冇人竞投?以去年12月17日三幅宝安观澜地块,底价楼面地价 3582元、4587元及4881元,加埋2000元建筑费,成本已喺5600到6880元之间。家吓关外楼盘已跌至7000元一平方米,即开发商系白做(甚至未来楼价唔再回落)。此乃去年12月起深圳卖地冇人承接嘅理由。今年1月16日,北京七幅土地拍卖亦只有三幅有人承价;上海市杨浦区新江湾城F地以 67.5亿元卖出,折合楼面地价7502元,亦大大低过预期;南京市江宁区去年底一幅地以3.86亿元卖出,平均楼面地价2618元,皆证明内地楼价去年年底开始进入拐点。
  去年第四季,内地新批出四只投资海外基金。喺今年第一季平均跌咗20%,令内地人士失望。QDII基金申请热潮在冷却中,因为表现较投资本土二百三十三只基金平均跌咗19%更差!唔少人曾经认为,海外股市O较A股低,甚至唔升亦唔应该下跌。点知QDII基金表现咁差,今天内地甚至批准港股直通车计划,嚟港资金亦唔会多。
  好多人担心负利率令2008╱09年本港楼价狂升,但2008╱09年唔系1990至97年。因为美元回落期快结束,同1990至97年唔同,系呢次本港工资及租金并冇大幅上升,冇法刺激本港CPI大幅上升。联汇制度产生嘅负利率环境只系外在因素,冇内在因素嘅支持。美元汇价跌令入口成本升,将本港嘅CPI升幅推高至 5%到6%;食品价格升,而燃料成本上升令交通费跟住升,却唔可以推动资产升值,因为工资升幅唔大。反而担心香港GDP增长率2008年下半年会跌。虽然港元一星期利率只有0.998厘及三个月1.9186厘,但港人冇信心借钱买楼!去年10月至今年3月利率由5.5厘跌至1.9186厘,一度推高本港楼价,依家更出现获利回吐,因3月18日减息后,相信4月底可能系最后一次嘅减息。3月18日起资金反由地产回流股市,支持近排恒生指数嘅反弹。零售业增长率亦有可能见顶,今年第一季升幅16.4%已不及去年第四季嘅17.7%。关心2008年下半年GDP增长率放缓渐成主流,不但令股价下跌,同时令本港房地产价格面对调整。港人明白廉价借贷背后系暗藏杀机,已唔会轻易再尝试。
  美国同欧洲金融市场反映投资者对银行股信心不足,未因贝尔斯登被收购而恢复番信心。呢点可由银行股息率一般高出三个月存款利率睇到。近日美国三个月国库债券利率同十年美国政府债券利率差又再扩大;有人认为系担心通胀率上升,令依家嘅低利率时代好快改变。存放三个月者可迅速转为存较高利率,揸十年期债券者则无法改变自己嘅命运而面对亏损(债券跌价)。过去嘅例子系人们面对通胀率可能上升时,只系增加债券波幅(Volatility)而唔系扩大二者利率差;例如伏尔克时代,二者利率差2.187厘,而波幅却达3.695厘【表】;格老嘅时代二者利率差已减少至1.689厘,而波幅亦减少至1.296厘; 2006年2月贝南奇接任后至2007年7月,平均波幅更跌至0.747厘,利率差减少至0.036厘。
  2007年8月起二者利率差扩大,唔系反映担心通胀率上升,而系反映担心GDP增长率下降。例如1981年8月至94年12月,二者利率差达2.129厘,呢段日子GDP系低增长期; 1995年1月至2007年7月二者利率差降至1.22厘,GDP平均增长率有3%;2007年8月开始,三个月期利率同十年期利率差距扩大,代表美国 GDP再度进入低增长期。格老已向全球预测美国未来十年GDP进入低增长期,如上述预测真系正确,美股亦将步入低O期,即依家标普五百指数O十八倍系企唔住。联储局职责要变
  格老亦为自己2003至05年低利率时期辩护,但联储局前主席雪茄伏却话联储局要为近期次按危机负责,并指摘联储局为Mother of All Crises。睇番1987年至今过去二十年嘅美国经济的确系一个泡沫爆破后又出现另一个;全球金融亦系一个危机后又另一个。根据雪茄伏嘅理论,系因为中央银行职责上改变,唔再成为监管机构及忽视咗金融安全网,改而成为商业银行资金提供者,造成全球资金泛滥嘅结果。雪茄伏建议唔系增加联储局权力,而系将联储局放回过去地位──监管者及金融机构最后安全网而唔系资金提供者。但联储局唔再成为资金提供者,依家流动性过剩立即变成流动性萎缩,美国经济好易陷入通缩期。过去格老每次面对危机都依赖增加流动性去应付,为美国经济带来最长繁荣期(1982年起至今冇出现衰退,1990╱91年有一次软着陆、2001年又一次软着陆)。系咪从此美国经济冇衰退定系一旦陷入衰退便出现humpty dumpty现象(甚至出动所有皇帝嘅兵马都冇法拉番佢返上墙上?)。
  道指短期响11700至12800点上落;恒指响20400至24500点之间上落;但标普五百指数及恒指3月18日低点却较1月22日低点略低,最后后市系升穿上阻力抑或跌穿下支持?各有各嘅睇法。过去六个月联储局已减息3厘及美元汇价亦大幅回落,未令股市上升反令CPI上升。OPEC表示,响今年9 月前唔会增产,认为油价上升系由美元汇价回落造成。2006年8月至今美国MZM货币增长率已由年率4%升到15%,美国货币供应增幅咁大情况下仍出现经济放缓,前景真系未能乐观。
  美国楼市泡沫爆破、美元汇价一跌再跌、油价保持高位,以及信贷压碎在进行中,股市炒上炒落;2008年金融市场的确可令人沮丧!
  IMF估计,全球信贷因次按危机影响而唔见咗12000亿美元甚至更大!情况更甚于九十年代日本,因为当年系单一国家,美国次按危机却影响全球。希望上述只系危言耸听唔系事实,如果唔系就惨啦。
  越南人口八千四百万,较成个广东省仲多,70%都系战后婴儿(越战响1975年结束)。全国人口平均年龄二十四点五岁,公民识字率94%,越南嗰边英文程度好高。家吓一个越南工人月薪响50至80美元,只及珠三角一带嘅人工一半。自从越南加入WTO后,一排排灰白色厂房喺城市郊区建起嚟,成为中国珠三角工业最佳嘅转移点。台湾商人更早喺1998年已响越南开始投资,例如造鞋、家具及成衣,依家估计已达四千家左右;今天台商对越南嘅兴趣大过中国大陆。除咗工资够平外,仲有丰富嘅天然资源及国内市场。今天胡志明市(往日西贡)到处都系建筑工地,情况好似九十年代嘅珠三角。越南起步大约迟中国十多年,1986 年先实行革新开放政策(中国喺1978年宣布改革开放),中国1992年已宣布建立有社会主义特色嘅市场经济体制,越南喺2001年先提出以社会主义为方向嘅市场经济。2003年高盛证券首次发布以越南为核心嘅研究报告,佢地估计不出十年,越南将超越印尼同菲律宾,成为东盟十国中经济实力最强劲嘅经济体。
  2007年越南GDP上升8.5%响全球中仅次于中国。自1986年宣布革新开放后,越南国内人口每日生活费唔足1美元嘅人口比例由51%降至2007 年8%,速度较中国快。过去二年越南股市总值由10亿美元升至146亿美元,但去年8月起又大幅回落,外国投资者以中国人为主。越南房价已直逼东京同纽约,例如胡志明市商业中心滨城市场商铺,每平方米卖17.3万美元;胡志明市城郊房价,每平方米卖2000美元。越南基建至今仲好落后,电力缺口达十亿度一年,道路仍以泥路为主,高速公路只得一条。
  依家投资越南应以建厂为主,不宜涉足股票及房地产;相信越南可成为另一个世界工厂。
为甘泉航空可惜
  甘泉航空董事李国源系我老曹读者,过去经过多次通话交换投资心得后做咗好朋友。我老曹为呢次甘泉航空清盘感到可惜,群众唔应该过分苛责。Do the right thing系大部分人都希望做嘅事,甘泉成立时唔系人人都赞咩?当时反而我老曹有微微哀愁。因为特区政府仍未开放香港天空,廉价航空公司点竞争?虽然Do the right thing, but not on the right time如何Make a fortune?有如买股票一样,如2007年8月入市则赚大钱,2007年10月入市则蚀大本,由此可见timing嘅重要性。特区政府至今未肯开放香港天空,加上油价进入上升期及美国经济开始转弱,及早止蚀成为唯一办法。证明今时今日老板唔易做,无论创业守业都咁难。
發佈留言