2008年4月16日星期三

做對沖基金經理好過做皇帝

曹仁超 2008-04-17
做對沖基金經理好過做皇帝

4月16日,周三。恒生指數跌22.98,收23878.35;成交646.2億元。4月期指升22點,收23870點;5月期指升32點,收23714點,仲係低水。短線弱勢格局一時難改,市場交投清淡,投資氣氛渙散。  內地已停批一年幾嘅QFII,已有五十二家海外機構獲批進入中國證券市場,總投資額102.95億美元。雖然有上述消息,內地A股仍未止跌。  滬深三百指數跌2.49%,收3494.02,因中國人行決定4月25日起上調存款準備金率0.5%,至16%。今天長江電力跌10%停板,雲南銅業亦跌停。有仔唔好恨做大明星  John Paulson成為去年最高薪嘅對沖基金管理人,收入共37億美元,跑贏索羅斯嘅29億美元,以及第三名James Simon嘅28億美元。全球首二十五名基金經理去年平均收入8.92億美元,較2006年升68%。今時今日有仔唔好恨做大明星,一定要做對沖基金經理。許冠傑三十年前首歌:「做老千好過做皇帝,前世。」今天應改為:「做對沖基金經理好過做皇帝,靚仔!」  今年美國唔係進入經濟衰退期,而係進入 GDP絲路至溫巴仙增長時代!估計今年標普五百指數純利平均跌6%,O由二十倍下降到十五倍;反之,每日指數波幅可超過2%,投資策略宜保守【圖】。熊市二期每次見底便強力反彈,第一季表現最出色係公用股,因為利率下降,4月份應係最後一次減息,即公用股上升期又差唔多矣。至於商品股我老曹睇唔通,農產品股亦一樣。  2000年1月至02年10月,標普五百指數O下降咗23%;去年10月至今,指數O只下降14%,估計仍可再跌10%(加上純利回落6%,即後市美股跌幅仍有15%)。戰後至今美股熊市平均跌幅32%,日子共三百八十四個交易天。如上述有參考價值,美股熊市應响明年第一季才結束,家吓約完成一半左右。  瑞信推介中保國際(966),估計今年每股獲利57仙,減少47.3%,O三十一點五倍,目標價23.53元。不可任何東西都想要  花旗推介新宇亨得利(3389),估計今年每股獲利18仙,升29.2%,目標價4.1元。因為中國對高價表需求十分殷切,而該公司計劃將零售點由2006年嘅九十二間增加到2010年嘅三百間。  一個人只有兩隻手,可以攞得住嘅實在有限,因此不能任何東西都想要。黎瑞恩曾唱過一首歌《一人有一個夢想》,事實的確係咁,一生人只做好一件事,咁就成功機會好大;反之樣樣想,但你只有兩隻手,又點可以攞得住咁多?英語亦有云:「Choice, not chance, makes life different」。人生過程中,每一個抉擇決定你嘅將來,而非所謂機緣巧合或運氣。人人所作抉擇不同,最後結果人人唔一樣。過去每一個抉擇皆影響你嘅今天,今天你嘅抉擇亦將影響你嘅將來。  例如我老曹相信依家係熊市二期,恒指响20000至25000點上上落落。上落市唔易玩,因此連放响分析股票方面嘅時間今年都減少咗。另一方面,我老曹仍偏愛美元及外幣,至今冇人民幣存款(雖然明知實賺)。上述點點滴滴,最後必影響我老曹未來所擁有嘅財富。一個人只有兩隻手,喺一生中你又攞得住幾多?  行止兄曾批評我老曹:「你除咗數目字外,其他一竅不通。」我老曹亦曾努力學習欣賞馬友友嘅表演,但係鎖你,現場環境實在太舒服,我老曹去咗搵周公。我老曹亦好努力學習欣賞西班牙舞后表演,但睇咗成晚,都唔識得欣賞佢好喺邊度?我老曹亦曾去過倫敦睇舞台劇,一如我太太評語,佢地着住D爛衫爛褲表演,點解入場券賣得咁貴?!到巴黎紅磨坊睇表演,亦唔明白點解巴黎美女中有咁多黑妹演員?我老曹嘅天分可能只喺捕捉趨勢上,而非欣賞藝術。  詹瑞文兄決定脫離政府資助佢嘅PIP公司,响財政上宣布獨立,此乃好事。去年我老曹曾同詹兄合作舞台劇(平時佢都幾忙),見到佢已筋疲力竭,响沙發上呼呼入睡十五分鐘,醒來後又龍精虎猛。反觀我老曹念台詞念咗四個鐘後,已經好想去死。詹兄一踏上舞台便生鬼得很,完全處於享受狀態;我老曹一踏上舞台卻呆若木雞,好多時左右不分。詹兄注定係食呢行飯嘅人,至於我老曹都係對住D數字好D。偶然玩票一次Cross over,可令人生多D色彩,但唔好被台下掌聲欺騙咗,以為自己連舞台劇都得?由始至終,我老曹並冇藝術天分(中學時代音樂呢科接近肥佬)。詹兄嘅一生應貢獻畀舞台,我老曹祝福佢成功。
---------------------------------

趨勢醞釀而未成形

  閒話少說。2008年最頭痛嘅地方係How to make Profits in Sick Economy。2008年首季已經過去,本港基金表現平均數係負增長,至於我老曹成績亦唔比基金公司好,即係略有虧損。  响上落市中挑選跑贏大市股份,並非想像咁容易,即使睇市正確,揀唔中上升股份一樣冇錢賺。畢非德所教方法──別人恐慌你貪心,別人貪心你恐慌,就更難做到,最多只能做到別人恐慌時你唔驚,別人貪心時你唔貪已經好叻,因為we are all human,都有人性弱點。  今年不妨放開 D,因為好多趨勢仍在醞釀而未成形(潛龍勿用)。人生中失去一次機會,仍有無數機會等住你;反之,一次重大錯誤決定,往往翻唔到身。年輕時一個錯誤決定,可以損失幾十萬元;中年時一個錯誤決定,可以失去幾百萬元;踏入老年,作出一個錯誤決定代價就更大,此乃點解年紀漸大,投資策略一定傾向保守嘅理由。請唔好嘗試outsmart the market。  乜嘢盈喜亦係過去嘅歷史,今年第一季業績較去年第一季好已冇乜刺激,問題係今年第三季業績係咪較去年第三季好才重要。股市冇過去,只有將來;炒股票唔係炒過去業績,而係炒前景展望。嗰D去年10月冇及時減持者,更喺投資研討會上努力 talk up the market去抵銷個人嘅恐懼感,可惜股市從來唔因多人睇好而上升,亦唔會因多人睇淡而回落。股市上升理由係因為人人想入貨,股市回落理由係人人想出貨而未果。今天有邊個仲坐擁巨資等入貨?持貨睇好則不值一哂。  今天投資銀行、對沖基金及其他非接受存款機構所提供嘅貸款早已超過傳統銀行,但經過次按危機後,以佢地嘅貸款能力,係咪仍好似去年8月之前同樣進取,例如槓桿比率達到一比三十(即1元資本、做30元借貸)?如果一如傳統銀行返回一比十二(1元資本做12元貸款),有幾多貸款將從市場上消失?由高O走向低O  踏入2008年,全球金融面對反槓桿化(de-leverage),簡單D講就係信貸收縮。上述情況以美國影響最大,歐洲少D,亞洲區又少D。去年8月前嘅資金泛濫情況已結束,近期各國央行努力注資亦無法扭轉此大趨勢,只能讓信貸市場收縮有秩序地進行,而非無秩序式撤退。上述影響唔係一季兩季,甚至唔係一年兩年,而係未來大趨勢,可令美國同歐洲GDP長期陷入低增長期。標普五百指數O正由二十點三五倍走向低O;反而歐洲上述問題唔大,因O已喺十點七二倍水平。從高O走向低O方法有二:一、企業純利保持增長,而股市指數不前,例如1966至82年美股。二、企業純利不前甚至回落,股市指數大跌,例如1990至2003年日經平均指數(依家已跌至O十五倍)。至於滬深三百指數點樣完成由高O走向低O?由於依家O仍高達二十七倍,一旦中國GDP增長率下降,股市要跌到邊個水平才有真正支持?家吓恒生指數平均O係十四點七倍。今天歐洲Dow Stock 50平均O十倍,恒指O十四點七倍,表面睇唔算貴,但純利中幾多來自物業升值重估?剔除物業升值後,恒生指數O絕對唔便宜(起碼冇歐洲及日本咁便宜)。何況抵買絕對唔係投資嘅理由。恒生指數已進入上落市,即升幅有限、波幅無限。  油價高企、食物價格高漲,歐洲同北美洲銀行及大金融機構則忙於集資,因為今年第一季虧損已令資本充足比率不足。响咁嘅環境下,後市可升幾多?去年下半年幾多股份高價被綁(以香港每天成交平均800億元計,一百二十個交易天,即有九萬六千億元股票喺市場高價易手)。大量股份高價被綁,形成今年股市進入短期供不應求,呢個拉鋸局面可維持幾耐?冇人可預知。
發佈留言