2008年4月15日星期二

曹仁超 2008-04-15 熊二多輸家

点金人工作室 - 2008-4-15 10:41:00

曹仁超 2008-04-15 熊二多輸家4月14日,周一。恒生指數跌856.59,創下3月17日以來最大跌幅,收23811.20;成交748.49億元。G7會議上,各國財長表示,持續八個月嘅信貸危機依然未結束,意大利財長更話可能進一步轉壞。中遠太平洋(1199)跌8.1%、中國遠洋(1919)跌7.3%、富力地產(2777)跌 11%、中國海外(688)跌5.6%、平安保險(2318)跌 5.1%、中國鋁業(2600)跌6.5%。恒指四十三隻成分股均下跌,冇一隻上升。4月期指跌765點,收23835點,微微高水。股市成為無底洞?  滬深三百指數跌6.54%,收3536.33,創11月以來最大下跌。三百隻股份只有五隻上升,萬科、保利地產、金地集團俱跌10%停板。《上海日報》引述人行副行長劉士餘報道,由於3月份CPI上升8.3%,擔心人行宣布再加息,將一年貸款利率7.47厘最少再上調一次。  受上周五美股大幅下跌2.04%影響,港股今天跌3.47%,成為今年十大跌市之一;滬深三百跌6.54%,亦係今年十大跌市之一。股市真係成為無底洞?今天內地A股市場地產龍頭股全線跌停,銀行股亦難逃厄運,普遍大幅下挫,因為一旦中國房價下跌,中國銀行股可能比美國銀行好唔到去邊。喺熊市中賺錢,除咗拋空外,就係買Put,學習除升市中賺錢外,喺跌市中一樣賺錢,尤其係手上持有唔少股票未有及時離場者。買Put除咗賺錢外,更有買保險嘅意義,喺股市進一步大跌下形成保障。買Put較拋空風險細好多,亦非乜嘢不道德行為。  喺熊市中千萬不可做嘅一件事就係估底。從歷史角度睇,不但美股仍然偏高,恒生指數仍然偏高,內地A股更為偏高,如唔信邪一再估底,到真正嘅底出現時,何來現金投資?熊市二期雖然係上落市,但大部分投資者係輸錢嘅,呢點要小心。資產價格面對反槓桿  呢次奧運聖火傳遞,證明世界上仲有好多人仍敵視中國,把中國視作敵人!如中國人自己唔爭氣,流入中國嘅熱錢隨時出現倒流。熱錢由中國大陸突然撤走,後果先至真正令人擔心。  據LIPPER報道,3月份香港股票強積金基金平均虧損4.93%,仍跑贏恒生指數跌幅6.09%及國企指數跌幅13.27%。印度孟買三十指數3月份跌11%、越南跌22.08%、深交所A股跌20.2%、上海證券交易所A股跌20.15%。少數上升嘅股市有台灣升1.9%。  花旗推介中海石化(3983),估計今年每股獲利36.6仙,升16.1%,目標價6.2元;銀泰百貨(1833)今年估計每股獲利25.5仙,升31.1%,目標價10.4元。  路透社估計,標普五百指數今年首季純利負增長13.8%(年初估計升4.7%)。其中能源及科技最為睇好,估計純利可升31%及9%;消費及金融最淡,估計分別回落13%及64%。  美國財長保爾森响上周六警告,今年將係困難嘅一年。金融市場繼續面對風險,資產價格面對重新評估及反槓桿。IMF則警告,今年食物價格保持高企,可能引發部分地區唔穩定,甚至可能引發戰爭。三通未見其利先見其害  德國西門子集團CEO Peter Loscher認為,未來六至十二個月信貸壓碎力量對歐洲嘅影響大於美國。Linde CEO Wolfgang Reitzle完全同意,而出現上述情況係因為時差因素。  台灣一向以出口電子產品為主要經濟收入來源。新台幣經過多年呆滯,今年首季新台幣兌美元升值6.7%,成為東亞地區中升值最快嘅貨幣,令台灣出口工業受壓;三通仍未帶來好處,卻先帶來壞處。  美國房產泡沫爆破變成次按危機,並向全球擴散;由愛爾蘭到西班牙,由波羅的海到北印度,從英國到東歐……。全球房地產市場一個接一個出現回落,今年3 月此風亦吹到香港甚至華南。北印度新德里樓價一下子跌20%。响西班牙,住宅樓投資佔全國GDP 9%,响愛爾蘭佔GDP更高達12%,唔似美國只佔GDP 4%及英國佔5%。西班牙過去十年新建樓房多達四百萬間(超過德國、英國同法國加起來總數)。樓價過去十年平均升幅300%,連當地的士司機亦投資三間住宅,每間投入10萬歐羅做首期,希望善價而沽。忽然之間佢發現市場買家難求,即使放棄10萬歐羅按金亦冇人肯承接。  巴塞隆拿IBUSA 地產代理Enric Bruno話,一年前佢嘅公司每個月成交超過四十間,去年年底已跌至每個月只六、七間成交,今年一個月只做成一、兩單成交。西班牙銀行BBVA估計,西班牙今年底失業率將達11%(去年8.6%)。愛爾蘭經過十六年樓價上升,去年回落7%後,相信今年將再跌7%;至於豪宅去年售500萬美元,今年400萬美元亦難搵買家,當地豪宅平均跌幅已達25%。  家和萬事興,家衰口不停。大至國家,小至社會、家庭,如果都能遵守「先幹不爭論、先試不議論、先做不評論」嘅話,都能興盛起來。反之,日爭夜吵,財神都畀你趕走。台灣由1992年起兩黨爭論咗十五年,結果如何?香港由1997年起民主進程議論咗十年,經濟又點?反觀中國過去三十年GDP卻大幅上升。 1980年中國先以深圳作為試點,成功後再擴大特區,之後再把成功策略用於全國。如當初為咗「姓社還是姓資」議論一番,中國仲有今天嘅成就咩?吵鬧唔係解決問題嘅方法,尤其東方民族太要飛士,好易各走極端,結果事情未解決早已反晒面。  無論台灣或香港,睇嚟都係應該少D爭論、議論、評論,多做D事。十年過去了,西九仍未上馬、郵輪碼頭仍未見郵輪、港珠澳大橋連藍圖都未落實。上海朱實在鬧得好,香港已陷入議而不決、決而不行嘅局面。政改進程爭爭吵吵十年,唔係仲原地踏步咩?恒生指數1997年8月已見16500點,今天又幾多點? 1997年香港人均收入已接近3萬美元一年,今天香港人均收入幾多?反觀中國過去三十年GDP保持年率10%上升,正與港人不斷拉近。
發佈留言